يديده وامي الغالية
يديده وامي الغالية…
قبل لا أدش آخر اختبار اليوم قعدت اسولف لج من قلبي لأن قلبي ثقيل وما يعرف يهدأ إلا إذا ناداج يمكن ما أقدر أشوفج بس أحس بروحج قريبة مني تحاوطني وتدعيني مثل كل مرة كنتي دايما تقولين لي قبل لا أروح الاختبار : ركزي وتقولين بعد : «الله وياج ومحمد وعلي » وأيضا : « بأمانة موسى بن جعفر » وتقولين لي : لا تتوترين حطي أيدج اليمين قبل لا تاخذين الورقة حطي أيدج على صدرج واقري: « فَإِنَّ مَعَ الْعُسْرِ يُسْرً ، إِنَّ مَعَ الْعُسْرِ يُسْرًا » وكنتي تقرين سورة الشرح كاملة وياي عشان ما أنسى شي بالاختبار.
يديدة
اشتقت لج أكثر مما توقعت اشتقت لج وكل يوم وكل ليله أصلي وادعيلج و في لحظات الخوف في لحظات التوتر في اللحظات اللي كنت أحتاج فيها كلمة تطمّني فقدج مو سهل وغيابج مو شي أقدر أتجاوزة لكني تعلمت أعيش وأنتِ بقلبي مو بعيني.
اليوم وأنا داخلة الاختبار بحمل خوفي كله وأحطه بين يدين الله وبأقول: يا رب ترى أنا ضعيفة بس قلبي مليان أمل.
وبأذكرج يا أطيب قلب وبأقول : ترى عندي روح غالية عندك يالله.
دعاؤها ما ينقطع وقلبها عليّ دايم إذا ارتجفت أيدي بتذكر حضنج الي كان ينسيني كل هموم الدنيا وإذا توترت بتذكر صوتج وضحكتج وأبتسامتج يوم أنزل ألقاج تصلين وتشوفيني وتبتسمين عسى أبتسامتج في العليين مع محمد وال محمد الأطهار ويوم كنتي تتألمين من الأدوية وفوق هذا كله تبتسمين لي.
يدتي الغالية على قلبي
أنا اليوم مو بس أدخل اختبار.
أنا أدخل وأنا شايلة تعب وسهر ودموع واشتياق لج.
وأتمنى يا رب تكون هالخطوة فرحة توصل لروحك قبل ما توصل لي.
أبيج تدعين لي من مكانك الطاهر.
أبي الله يسهّل عليّ يفتح لي أبواب الفهم.
يثبّت قلبي قبل عقلي.
ويخلّي كل سؤال يمر عليّ سهل وواضح.
وإذا نجحت,
أول فرحة بقلبي بقول: «هذي ليدّتي »،
وإذا تعثّرت,
بعرف إن الله يخبّي لي شي أجمل.
وإنك راضية عني مهما صار.
يدتي
وجودج في حياتي نعمة.
وحتى بعد رحيلج بقيتي نعمة بدعائج.
وأنا أستودعتج الله في كل لحظة.
وأستودع نفسي عند الله بحقج وبحق محمد وآل محمد عليهم السلام.
ادعي لي يا يدّتي
ترى قلبي محتاج دعاءج.
وترى اليوم يوم مهم.
وأنا أبي أدخل وأنا مطمئنة إنج وياي بروحج الطاهرة.
لين أطلع وأنا راضية ومهما كانت النتيجة قانعة ومسلّمة.
